INICIAR SESIÓN

Emprendemento - Inicio

Dende a Coordinación de Emprendemento do CIFP Ánxel Casal- Monte Alto queremos darvos a benvida a este espazo que nace co espirito de fomentar o emprendemento entre o noso alumnado.

Neste canle de comunicación iremos informando de todo o relacionado con emprendemento:

Actividades que se desenvolvan no centro

Ligazóns a información e ferramentas de xestión empresarial

Novidades en materia de lexislación que afecte ao autoemprego

Axudas e subvencións para a creación de empresas

… En definitiva, queremos crear un espazo para difundir e promocionar a cultura emprendedora, onde apoiar e asesorar a todos aqueles alumnos que opten polo autoemprego como vía de incorporación ao mercado laboral.

Por iso, dende aquí queremos animar a todos aqueles que teñan unha idea de negocio a levala á práctica.

CHARLA MOTIVACIONAL DO PROGRAMA DE EMPRENDEMENTO DA FUNDACIÓN REPSOL

O pasado mércores 3 de outubro, tivo lugar no noso instituto, a charla motivacional na que se presentou o Programa de Emprendemento da Fundación Repsol.

Dito programa é unha iniciativa da Fundación Repsol en colaboración co Centro Internacional Santander Emprendimiento (CISE) que ten por obxectivo  fomentar a cultura emprendedora a través dun modelo de traballo no que participan alumnos de FP, profesores e voluntarios Repsol.

Este proxecto levarase a cabo ao longo do primeiro e segundo trimestre, e desenvólvese en cinco fases, nas que, a través de talleres de formación dinámicos e prácticos, descubrirase como emprender un proxecto, a partires da metodoloxía "aprender facendo"

Ao final da charla, os alumnos interesados en participar no programa apuntáronse nunhas fichas que lles facilitaron os poñentes, o noso alumno de 2º de Próteses Dentais, Wesley Pereira da Silva foi entrevistado e comentou o interesante e útil que lle pareceu a charla. Ademais para participar na primeira fase, o Hackaton, deben inscribirse na seguinte ligazón ata o 18 de outubro:

https://www.fundacionrepsol.com/es/formulario/emprendimiento-fp

Os relatores do acto foron Iván Dobarro e Pablo Campos, ambos cunha dilatada experiencia profesional:

Pablo Campos

A experiencia profesional de Pablo pasa por empresas como Google, Peugeot-Citroën ou Telefónica Internacional, onde tivo diferentes responsabilidades. O desenvolvemento de negocio e as operacións son os dous piares nos que desenvolveu a súa carreira.

Apaixonado polo ecosistema emprendedor, dirixiu as operacións de Quobis cando aínda estaban en fase Startup. Actualmente é mentor en Wayra, poñente habitual en citas como 3DS, Vindeira, ViaVigo, Yuzz ou a entrepreneurshipweek.

Profesor no máster en innovación industrial da Universidade de Vigo, compaxina a súa dedicación profesional entre a docencia, un proxecto relacionado cos futuros coches conectados e posiblemente unha próxima nova aventura emprendedora.

Iván Dobarro

Iván formouse en Administración de Empresas na Universidade de Santiago de Compostela, especializándose posteriormente en Dirección e Tecnoloxía Empresarial pola Universidade Camilo José Cela de Madrid.

A súa traxectoria profesional pasa, de xeito reiterado, polo emprendemento, tanto con proxectos propios como a través do asesoramento, fundando 2 sociedades, a primeira aos seus 18 anos. O seu último proxecto céntrase no desenvolvemento de negocio dunha Startup Compostelá ligada á seguridade alimentaria.

Iván recibiu diversos premios en relación ao seu traballo emprendedor, é un apaixonado da tecnoloxía, do emprendemento e da innovación, o que lle permitiu exercer de poñente en Yuzz e na Universidade de Santiago en diversas ocasións.

Actualmente coordina o departamento de I+D nun grupo empresarial galego de consultoría e negocios B2B.

FUNDACIÓN REPSOL – PROGRAMA DE EMPRENDEMENTO

Ao igual co ano pasado, a Consellería de Educación xunto coa Fundación REPSOL presenta o seu Programa de Emprendemento na FP. A vindeira semana celebrarase no noso "insti" a charla informativa:

  • data: mércores, 3 de outubro

  • Hora: de 13:00 a 14:30

  • lugar: salón de actos

  • destinatarios: alumnos de 2º curso ordinario ou modular que teñan EIE da familia de Sanidade

O obxectivo é fomentar o espírito emprendedor do noso alumnado, transmitir a cultura emprendedora e proporcionar ao alumnado unha formación específica e práctica sobre como por en marcha unha empresa.

O pasado curso participáramos cun proxecto moi interesante relativo a un produto limpiador e hixienizante das prótesis dentais.

Animádevos a participar!

PROGRAMA FINANZAS PARA MORTAIS

Este programa ten por obxecto fomentar o emprendemento e a cultura financeira no sistema educativo non universitario como motores da innovación, a competitividade e o crecemento da economía. Esta actuación está encadrada no Plan de Emprendemento no Sistema Educativo Eduemprende.

 A actividade diríxese ademais de aos titores de viveiro e coordinadores de emprendemento a calquera outro profesor do centro interesado e aos usuarios do viveiro. Refírese aos viveiristas con plan de empresa, con empresa en funcionamento dentro ou fóra do viveiro, persoas que solicitaran asesoramento de calquera tipo no viveiro, alumnado que desexe participar en distintos programas ou concursos de emprendemento ou presentar proxectos de empresa, así como calquera outro alumnado de FP que estea interesado nesta formación.

Toda a información desta convocatoria pódese consultar na seguinte ligazón http://www.edu.xunta.es/fp/eduemprende-finanzas-para-mortais-2018-2019

Trala publicación da convocatoria na páxina web da Consellería de Cultura, Educación e Ordenación Universitaria http://www.edu.xunta.es/fp , as solicitudes para participar no programa enviaranse ao enderezo Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo. ata o 30/09/2018.

BENVIDA AO NOVO CURSO 2018-2019

Xa chegou o novo curso 2018/2019 e con el a Coordinación de Emprendemento do CIFP Ánxel Casal-Monte Alto, que dende o seu blog segue a fomentar o emprendemento entre o noso alumnado e promocionar a cultura emprendedora, por iso, seguiremos informando de todos aqueles aspectos que vos animen a convertervos en emprendedores e dar o paso cara unha aventura empresarial, poñendo a vosa idea en práctica.

Recordade que contamos cun VIVEIRO DE EMPRESAS que é un local dividido en despachos equipados con moblaxe, sala de reunións, equipamentos informáticos e os servizos precisos para levar as xestións necesarias para a posta en marcha da túa iniciativa emprendedora. No viveiro tamén contarás con asesoramento para o teu proxecto.

Poden acceder os alumnos que teñan un proxecto empresarial a desenvolver en Galicia, sempre que estean matriculados no derradeiro curso dun ciclo formativo de formación profesional, os que o remataran nos catro últimos anos, e tamén os que estean a estudar bacharelato.

O procedemento de acceso consiste en:

  • Entrevista inicial co titor do viveiro
  • Elaboración do plan de empresa
  • Se o proxecto se valora como viable, asinarase o Contrato de cesión de espazo no viveiro de empresas do CIFP, para usar de forma gratuíta as instalacións do viveiro como sede da empresa.

Poderase gozar das instalacións do viveiro por un prazo de 2 anos, prorrogable nalgúns casos ata 3 anos.

Para mais información contactar coa titora do viveiro de empresas, Paula Díaz Carballada, no seguinte  horario:

  • luns e mércores: de 10:30 a 11:30 e de 12:00 a 13:00 horas